De madanm i fet 100-an
20-July-2015
De madanm -- Alda Philo en zabitan Anse Royale ek Raphalda Jacqueline ki en zabitan St Louis me ki reste Kouvan St Elizabeth -- ti fet zot 100enm lanniverser semenn pase.
Sa de madanm ti ne en zour ant kanmarad -- Madanm Philo le 14 Zilyet 1914 e Madanm Jacqueline son landmen.
Apre ki i ti’n resevwar en benediksyon kot son lakour sa zour, ‘Dada’ parey Madanm Philo i koni dan kominote, ti selebre son lanniverser dan en rankont ki ti fer kot restoran Asian Fusion Sanmdi swar, avek son bann fanmir ek zanmi.
Osi prezan ti Minis pour Zafer Etranzer ek Transpor Joel Morgan ki ti pe reprezant son koleg pour Zafer Sosyal, Devlopman Kominoter ek Spor Vincent Meriton. I ti prezant Madanm Philo avek son meday santener e en pannyen sorti kot Prezidan James Michel.
Menm si i pa ti kapab fer en gran diskour, Madanm Philo ti remersye Minis Morgan pour sa ki i ti apel «son sipor ek lankourazman». Me i ankor kontan ekout lanmizik e menm danse.
Ladministrater distrik Anse Royale, Jim-Roy Jeannevol, ki ti osi prezan e ki avek ladministrasyon distrik ti’n kontribye pour organiz sa parti lanniverser, in dekri Madanm Philo konman en dimoun ki ti aktif dan distrik Anse Royale. Sa ti sirtou dan legliz son parwas, St Joseph.
Kant a Madanm Jacqueline ne Cassime, son parti lanniverser ti fer yer apremidi dan Sant Sosyal Rivière Anglaise.
Se kandida Parti Lepep pour prosen elekyon Lasanble Nasyonal pour distrik St Louis, Fabian Palmyre, ki ti prezant Madanm Jacqueline, ki osi koni konm ’Dada’ avek son kado e ladministrater distrik St Louis Rachel Joseph li i ti donn li en mesaz sorti kot Prezidan James Michel.
Madanm Jacqueline i premye manm dan son fanmir pour arive viv ziska 100-an e i annan en sel ser ki ankor vivan. Son de lezot ser ek de frer in mor.
En sel dan son de zanfan, en fiy, i ankor vivan.
Ler nou ti koz avek Madanm Jacqueline i ti dir : «Mon ankor an bonn sante akoz mon manz byen. Mon manz bokou manze kreol».
I ti azoute ki in travay bokou depi laz 13-an ziska 75-an e in pas 17-an son lavi aletranze – 4-an Dyordenn e 13-an Itali.
«Laba mon’n fer bann travay lakaz parey kwi manze, netway lakaz e lave,» Madanm Jacqueline ti dir zournal Nasyon.
Son neve, Simon Lespoir, ti dir ki son tantin in fer zot tou fyer e ki son prop manman ki ti mor alaz 97-an e son defen tantin ti fer en swe ki fodre fer en parti pour nenport dan lafanmir ki arive viv pour selebre 100-an.
«Pa manke pour fer en zoli gato,» i dir son defen manman ek defen tantin ti dir li.
Msye Palmyre li i ti dir ki Madanm Jacqueline in sirman akimil bokou lasazes pandan sa 100-an ki in pase lo later e i espere ki i a viv ankor plis lannen e kapab pas sa bann bon fason viv avek bann zenn.
Madanm Joseph lo son par ti azoute ki Madanm Jacqueline in vin katriyenm santener dan distrik St Louis e ki sa distrik i tre fyer.
Sa trwa lezot santener dan distrik St Louis i Marguerite Hoareau (ki ti selebre son 105-an le 10 Zilyet), Eva Bethew (ki pou selebre son 101-an le 31 Zilyet) e Margaret Pouponneau (ki pou selebre son 102-an le 15 Out).
0 comments :
Post a Comment