‘Moman Kreativite’ i asir relev artistik
29-October-2013
‘Moman Kreativite’ in toultan enn bann aktivite prefere piblik lo progranm Festival Kreol. Sa i san dout akoz dan sa spektak varyete prezante par bann zanfan lekol, bann zenn artis pa’n zanmen manke pour anim e enpresyonn piblik avek zot talan, atraver zistwar, pyes teat, sanson ek lezot form lar ki ofil bann lannen, in vin pli orizinal e pli zoli. I pa drol alor ki ‘Moman Kreativite’ in en aktivite ki’n toultan lo randevou Festival Kreol depi en kantite lannen ki Minister Ledikasyon i ofer talan artistik bann zanfan koman son kontribisyon dan nou festival. 28enm edisyon Festival Kreol pa’n en leksepsyon, kot dan spektak ki ti fer kot Sant Konferans Enternasyonal Dimans apremidi, bann zenn artis pa’n zis montre zot talan, me zot in osi fer pase en mesaz for ki fodre nou prezerv nou kiltir.
‘Moman Kreativite’ ti alor en vre moman detant dan prezans bann zanfan, azoute a plezir pour vwar e antann zot domin lasenn avek zot bann zistwar ek pyes teat, manipil lenstriman lanmizik, melanz metriz diferan laranzman mizikal avek zot zoli lavwa e dans kanmtole dan en fason toutafe natirel.
Avek en panse deza pour lannen prosenn, piblik in sirman al dan lakour Dimans avek bann moman for sa spektak ki’n reste dan memwar: Parey leritaz kanmtole lekol segonder Anse Boileau, zoli sanson lekol Biznes e Kontabilite e talan teatral Lakademi Tourizm.
A limaz bann zenn lekol Mont Fleuri segonder ki atraver en pyes teat ti’n reenkarn François Havelock, Michel (‘Too Late’) Lagrenade ek ‘Ton pa’ (Jacob Marie) e ki ti pe demande ki memwar nou bann gran artis i reste prezerve dan en mize, ‘Moman Kreativite’ i en fason pour fer bann zenn apresye e defann nou tradisyon ek leritaz. Pli enportan, i osi form bann fitir artis e ekspoz zot avek lasenn depi byen boner. Dan sa fason, relev artistik Sesel i asire!
Nou seleksyon portre tire par fotografer Louis Toussaint i montre enn de moman for dan ‘Moman Kreativite’.
0 comments :
Post a Comment