 |  En drol loder i fer serten manm piblik raport klinik - 28.02.2012Plizyer manm piblik ti bezwen raport sant lasante Rivière Anglaise yer bomaten apre ki zot ti’n ganny afekte par en drol loder dan en parti batiman Orion Mall.  Sef zofisye Lazans Servis Tenny Dife ek Sovtaz, André Morel, ti dir ki apre ki zot ti’n ganny alerte lo sa lensidan, zot ti al laba ansanm avek bann zofisye lanvironnman ek lasante e zot ti dekouver ki sa loder annwiyan ti sorti anler dan Orion Mall. “Sete dan en bout sa batiman kot en zimnaz pe ganny konstrir ki nou ti war bann travayer en lakonpannyen konstriksyon Sinwan pe servi en sibstans pour pas lo dibwa. » Touzour dapre Msye Morel zot pa ti kapab detekte sa prodwi akoz son non ek lezot lenstriksyon ti an langaz Sinwan. I ti dir ki zofisye lanvironnman in pran lesantiyon e zot ti fer sir ki tou sa dibwa ki’n ganny penn osi byen ki sa bann sibstans i ganny zete. Dapre en zofisye lasante piblik, Nicholas Shamlaye, i annan dimoun ki’n raport casualty Rivière Anglaise avek bann iritasyon lapo osi byen ki respiratwar. I ti fer resorti ki lesantiyon sa sibstans in ganny anvoye kot Biro Standar Sesel e antretan Orion Mall pou reste fermen ziska ler zot konn konteni sa sibstans. Tou lesey pour ganny komanter en zofisye lanvironnman lo sa lensidan ti anven. |
0 comments :
Post a Comment